Heb 12 | ASO | STEP | A'mine O'mosomu' gele ele'vole' ogali'mi monovo di soto' mili lelebizave muki' ingine nene limuso ne'mini vai' goloso mini hizi vodo vodo i-lidi vonu' libili nizani' giline' nemu' nene laza okodela lihitehe' inite' vai' nene do hulo ido' lihime initeli'mo gizedelo' izo do mine' mine' iline' inite' nesi nene do hulo hazala ogo O'moso'mo aka lelebizidokovo' nene inite' mali'mo a'mine aka hize tile-ledamivo ido' ahukisi mo lamo lotikovo' izo vo minelone.

Hebrews 12

Izesungumu' Gele Ele'vole' Ogo Monoli'mi Lesisi'veu' Loti' Izo Mino Geni Lebelelingukisi Amuzo Molo Mineloningu' Nene Laza Nadi' Olobe Nemu' Lo-ngimine'

1 A'mine O'mosomu' gele ele'vole' ogali'mi monovo di soto' mili lelebizave muki' ingine nene limuso ne'mini vai' goloso mini hizi vodo vodo i-lidi vonu' libili nizani' giline' nemu' nene laza okodela lihitehe' inite' vai' nene do hulo ido' lihime initeli'mo gizedelo' izo do mine' mine' iline' inite' nesi nene do hulo hazala ogo O'moso'mo aka lelebizidokovo' nene inite' mali'mo a'mine aka hize tile-ledamivo ido' ahukisi mo lamo lotikovo' izo vo minelone.

2 Ido' ne'mino loti' izo novo O'mosomu' gele ele'vole' oga' monovolo' nene gomu' molo lemo a'mine monovolo' e'mete osu' losa aka lelebizive Izesu'nivo' nene e'meto volone lo eitokovo' nene vete hulo-do volone. Aza nene alinge' nolize izo minelongumu' ve lo gelo evenelite ve goloso ve li gili lohoto' zalo' bililizangumu' ovozo helo minelingumu' nene haza inite' ve lo gele hulo golise vamo a'mine lohoto' zalo' bilangukisi nene amuzo molo minine' ve. Ne'mine ogo O'mosolati' lemo mineline' mo'mosi'velo' O'moso'mo ana hulaa' ida vo neive. 3 Ido' Izesu' monovomu' gililizani' nene aza mo hize ele' o-ledeline' nenako nemu' nene lingine monoku' amuzo molaakumu' gosele' lengebelavo lutine nene vo gilizevo ogalive li lihime daa' ave nete Izesu'ni biluva' i-daa' angu' amuzo molo minine' mamu' nene gili minilo.

Vete Zopovo Si'zo Monovo Lisihetokovo' Moneloningumu' Ve Lo O'moso'mo Geni Initeli'mi Lulou' Hulo-ledaa' Neingumu' Lo-ngimine'

4 Lingine goloso inite' ne'mo do ongo-lengedelesa neivo amuzo mili lovo i imi a'mine'mi lulouti' nene lingine olihe vanise lepi hilamave. 5 Ido' lingine O'moso'mo muludingu' do lamine' ogo gipe'ne ve lo gamazi ma mono' godolou' ti' lo lo-lingidine' mamu' nene gatine molahe. Olo:

Gipe'nee, Guvelesi ve'mo evene' ma lulo ngemo minelive nene
ve'ine zopovo si'zi monovo lisihetokovo' monilizangumu' ve lo
geni initeli'mi lulou' ngele'mize molaloseive.
Ee, gipe'ne ve lo ningaa' ive muki' nene
ve'ine zopovo si'zilizave lo ngebeleleseive.
Ido' ne'mine oloseinako nemu' nene gaza Guvelesi ve'mo
veka zopovo si'zo monovo lisihetokovo' moneline lo
do lisihe' o-gedo geni initeli'mi lulou' gele'mize nomolavo ma
gaza nemu' gelanivo haza inite' lolo' amivo.
Ido' lihimeka nogimivo ma nemu' gosele' gebelamilive.
7 Geni initeli'mi lulou' mini ma nene Guvelesi ve'mo lele'mize akalo' neive li a'mine inite' nene gosele' lengebelamivo ha gihi minilo. Me'ninge nete gipe'ine ma ve'ine zopovo si'zilizave li ngibili di hehe li-ngidami huli-ngimikavo minani' nene ma minamavo mukito' nene ngibili di hehe li-ngidaa' nani' nemu' nene O'moso'mo linginesi gipe'ne nizave lo ne'mine o-lengedo noloseive. 8 Ee, me'ninge muki' nete gipe'ine ve'ine zopovo si'ziliza inite' di-ngidi di hehe li-ngidaa' naanako lengikisi O'moso'mo ne'mine o-lengedo minamine' neidiniko ei' izipahala zuho minami akalo' izipe ne'mine minadine. 9 Ido' a'mine gamazilo' imine' molo ma lolove. Ha okode losuvosi none' mene gidave metemote nete leli' vete zopovo si'zilizave li di hehe li-lidavo gelekele' o-ngedo mino lamine' gilune' nenako nemu' nene ne'mine o-ngedaa' noune' nene ivile' ogo vode lute lemeni dameni do soto' o-ledaa' ive metehine nene nabosa gelekele' o-duke'vo. Olo. Ee, laza ne'mine ogo ezelati' minevo' minevo' lemeni do minevo' minevo' olosunako nemu' nene gelekele' nabo o-do minelone. 10 Ee, me misubou' metemote di hehe li-lidavo gelekele' o-ngidune' nene ingine engi' lu'nido' lamine' oloseive li gilado' gamene li'nibevo' di hehe li-lidaa' ani'za O'moso ei' ne'mino lihimete goloso daa' monovote nene nomivo monovote lisihekisivo' minelone lo lele'mize lamine' iline' inite' do soto' o-ledo do hehe lo-ledaa' neine' nenako nemu' nene gelekele' nabo o-do minelone. 11 Vete zopovo si'zeloningumu' ve li di hehe li-lidi geni initeli'mi lulou' lele'mizi milikevo a'mingu' minelone' gameneu' nene lolize izo lanite' gelo minelonivoba ha mulumo alumo gelo minelesune'za ne'mine olone' ne'mo lele'mize akalo' ogavo ma alinge' ne'mi gihile've nene monovo lisihe' laminekovo' ogo molo nonivo lute nene zou lo minaa' neive.

12 O'moso'mo vetine zopovo si'zilizave lo geni initeli'mi lulou' lengele'mize molaa' neine' ne'mo nene lengele'mize lamine' oloseinako nemu' nene lingine lutine gopo o vivo lutine'mi gizene ana've nene gulu' gelo izo bele vivo lutine gilizevo ogo minaa' neine' nene gohi di oti-di gonou' ele'mizi milalo. 13 Ne'mine igi lutine ne'mo mono' akalo' volosa neivo ma lengiku' ve ma lingine lutine'mi gizene've goloso o vivo minave lingine nene gopo aka mili vami a'mido' lamini nivi lamine' ilizangumu' nene aka lamine' di hehe li vi minilo.

Ingine Monovo Lisihe' Igi Mili Ami O'moso Mehe'ine Imikevo Lihime nGemalive Lo Ga'ine Dani' Gamazi

14 Ido' lengiku' lovo lolize nene soto' ogalive li evene' mukita hongu monovo nene igi mili ngelebizi minilizangumu' nene amuzo milalo. Ido' ve ma ingine O'moso'mi evenelelite di minilizani' monovo lisihe' lamine' nene engita nomivo minaa' nave nene Guvelesi ve mo ningamilizani' nenako lingine hongu monovo igi mili ilizadoti' nene O'moso'mi evenele nounako li monovo lisihe' laminetokovo' e'meto volone li amuzo mili minilo. 15 O'mosolati' nasahili' lamine' nene lengi' zuho malite ningi huli aka malo' vikelizave li ge gizebo o-nede ne gizebo o-gede li minilo. Ido' lengi' zuho mali'mo lengi' vovotingu' mino za mali'mo gihile ekese' ine' izaa' neine' ne'mino mino monovo goloso ato ato' do soto' ogo lengita geni do soto' o-lengedo neivo lengikuti' evene' lingela muki' nene a'mine'mine igi monovo goloso dikevo lutine do gopo ogalive li gizebo lekeseve igi minilo. 16 Ido' lengikuti' vene' vemoho' gopo'napa ingi monikelizave. Ido' lengikuti' evene' ma Esau' ne'mine mini O'mosomu' ga'ine molavo me misubou' initekumukovo' gili minikelizave li ge gizebo o-nede ne gizebo o-gede li minilo. Esau' aza nene Isaka' gana' gipele mino melehido' medelo mino melehi inite'velokisi nene medelo minelido' minine'za gamene ma a'mine uvoloho Esau' aza ga'na helo nakunolo Zakobo' noso' nite' gize vata' ogo minine' nenako a'minguti' nene linge ma nemavo nalongisi ve lo haza misubou' inite' noso' niteto' nene melehido' medelo mineline' mo'mosi've nene nakunolo Zakobo'ni eme molani' ve. Ee, Esau' aza O'mosomu' gala molavo me misubou' initekumukovo' gele minive mino haza noso' nite' nene gamene hamokovo' nalosa ido' nene inite' naba melehido' medelo mineline' mo'mosi've nene Zakobo'ni imine' ve. 17 Emavo Zakobo' ezelo' medelo minavo alinge' meleho aza gana've no'noho' ize-deline' no'noho' nene Zakobo'ni ize-davo Esau' aza me'neho no'noho' nene do tine' molo neni' no'noho' ize-nedelive lo ive ogo lulo do velepe' izeline' aka vise' ogo minine'za ma ningamivo meleho aza Esau' gamazi've gele huline' nene lingine mo gili nizani' ma neize. Nemu' nene lingine eze ine' ne'mine amilo.

18 Lingine O'mosola igi gi'mizani' nene Isilaele' aleve leli' avotemote Sinae golola lou' gamazi lo huko-ngidine' dalisa vangu' soto' ogo minine' inite' ne'mido' nene lingine ma amave. Ingine ha ve'inedunukovo' ningi ido' ga'inedunukovo' gililizani' inite' nevo'minevo' neido' ani' ma neive. Ee, ingine Sinae golola vado' nene olo' gulumo ogo minivo ido' liti'muso goloso izo minivo ido' hepe' naba mumu gehe gehe ogo elo minivo 19 ido' pikuli ne'mo nolo naba molo minivo ido' O'moso'mo gamazi livo gilave nete nolo nene gilangumu' golise gili gamazi gohi ma lelito' lisihe' ogo lo lemamilive li amuzo mili Mose'ni li-imani'. 20 Ido' O'moso'mo ti' lo lo huko-ngidine' nemu' ngemengingi goloso izine': A'mine Sinae golola vi lisi gililiza initepe evenepe nene mo geheni huli huli' igi ngibili hililizave. Ido' evenekovo' nevoba ize gulo nesi a'mida vi lisi gililizani' nene mo ngibili hililizave lo line'. 21 Ee, ingine ningani' inite' nene ngemengingi izaa' inite' atoli'mine goloso minavo Mose' aza nehelele goloso izavo luvoluvo zalo' do nouve lo lo-ngimine'.

22 Ee, lingine nene avotemotida Sinae golola ngemengingi inite' soto' o ngimine' ne'mido' nene ma vamave. Asi a'mine ngemengingi inite' ivile' ogo lamine' goloso minine' initeto' ikeni' neive. Ido' Zelusalemi numuno ebeku' minine' golo Zaioni ne'mine minevo' minevo' O'moso'mi numuno ebe' Zelusalemi ne'mino Okulumokuko minine' numuno ebeku' Zaioni golo mala nene lingine mo imi hilikeve. Ido' angelo' tauseni tauseni ne'minete zege' zege' igi ngolize izi minadasi 23 ido' O'moso'mo no'noho' ize-ngedeline' izipahala Okulumo' ebe' ngemelingumu' gulive'ine Okulumoku' gize molave engi' muliseukisi nene mo imi hilikeve. Ido' evene' mukiliti O'moso leli' zaasi naba minidasi ido' ve lisihe' ne'mine mo hilikevo sikalahu'ine O'moso'mo mudise ngele'mize lamine' ogavo nizada nesi nene mo imi hilikeve. 24 Ido' lelikisi O'mososi kuku holo-ledo gamazi hulo volelo' melo' o-ledo O'moso'mo gamazi lamine' gosoho' lo huko-lidine' lo-do ogo limive Izesuda nesi imi hilikevo vanise've lutido' hibi' izo huline' gelavo minikeve. Kaini' aza Abeli'ni bele hiline' vanise've nene misubou' do'mozavo O'moso'mo ningo Kaini'ni nene lihime imine'za Izesu'ni bili hilani' vanise've nene ningo lihime lemamo isete izine' nenako a'mine vanise've ne'mo gono dani' nene Abeli' vanise'mo gono dani' nene ivile' ogosa gono lamine' dani' ve. Ne'mo lingine nene mo a'mingu' imi hilikeve. Ido' lingine a'mingu' nene mo imi hilikenako nemu' nene O'moso'mo nasahili' o-ledo hize ele' o-ledaa' neine' nene lengikuti' ve malite ningi huli monovo goloso lengi' vovotingu' di soto' ikelizave li gizebo lamine' igi minilo.

25 Ee, O'moso'mi gamazi Izesu' lo-lingimine' nene hulikelizaze. Gizebo lamine' igi minilo. Ingine O'moso'mi gamazi misubou' mene Mose' lo-ngimine' gili hulave nene O'moso'mo ngebelelinguti' olovo' igi golise viliza aka'ine ma minamivo aza lihime ngemaa' neine' nenako nemu' O'moso'mi gamazi nene Okulumokuti' lo-limine' nenako gele hulolone' nene laza O'moso'mo lihime lemelinguti' nene mo keke' ngelo olovo' amolosunako nemu' nene a'mine gamazi nene gili hulikelizaze. Gizebo lamine' igi minilo. 26 Mose' Sinai gololo' dizo minine' gameneu' nene O'moso'mo gamazi nolo-imivo nolo ne'mo misubo nene do mo'mongo' ine' ve. Ido' O'moso'mo idise ti' lo lo huko neine' ma neive: Ihe' inite' muki' nene gamene hamokovo' ma do mo'mongo' olosuve. Ido' misubovo' nevoba okulumo' nesi do mo'mongo' olosuve lo line' ve. 27 Ido' inite' mata' nene gohi do mo'mongo' olosuve lo line' nene aza inite' mata' muki' do soto' muluvoni' nene do mo'mongo' ogo do hulokuvo mo'mongo' ami minilizani' initekovo' nene ha minivi' minivi' ilisave lo gele mino do mo'mongo' ilingumu' line' ve. 28 Ido' laza O'moso'mo gizebo ingu' mo'mongo' amiline' ebe' minevo' minevo' ilingu' nene vo holokune' nenako nemu' nene O'moso isaa' neve lo-do opo'ni lo-delone' nene mulunou' lamine' gelelidokovo' o-delone. Ido' ololi'mo inite' lo'voto osu' liline' ne'mino O'mosote ne'mo evene' goloso ngebele osu' loloseinako eze opo'ni lolone' nene ezemu' lehelele izivo golise've gele mino ne'mine ogo minelone.